Mathilde Tønjum og Ruxanda Movileanu
- KDA-elever.

Administrasjonen i Vestland vil legge ned programområdet Kunst, design og arkitektur på fire av fem skular. KDA-tilboda blir i så fall fjerna frå Voss gymnas, Fusa vgs., Førde vgs. og Olsvikåsen vgs., og sentralisert til Årstad vgs. i Bergen sentrum. No er det rundt 500 KDA-elevplassar i fylket. Fylket vil nesten halvera plassane til 270, som er veldig lite for eit stort fylke som Vestland. Dei foreslår å erstatte plassane med studiespesialiserande klassar og få fleire elevar over på yrkesfag.



Å flytta frå heimstaden til ein storby som 15-16-åring kan vera skummelt – og ikkje minst dyrt. Det er tryggare å flytta til ein mindre stad, og kreative elevar frå distrikta i Vestland kjem ikkje til å flytta til Bergen for å gå på KDA! Det er svært langt frå Lærdal, Eidfjord, Flåm, Innvik og Stryn til Bergen, og det er ikkje realistisk at foreldra våre let oss flytta fem timar heimanfrå – til Bergen.

Me treng ikkje fleire studiespesialiserande klassar. Me vil bruka dei kreative evnene våre, og vil ikkje velja tre år med berre teori. Når me derimot får ein variert skulekvardag med både teori og praktisk arbeid på KDA, blir me meir motiverte.

I dei kreative faga trivst me å arbeide analogt og digitalt, lære problemløysingsteknikkar og opparbeide praktiske ferdigheiter. I Arkitektur og design jobbar me med berekraft, løyser brukarbehov og blir kjent med ulike materiale og formspråk. I Kunst-faget ytrar me oss gjennom form og farge. Etter tre flittige år får me generell studiekompetanse.

Viss distrikta i framtida berre skal tilby enten studiespesialiserande fag eller yrkesfag, så er det mange av oss som vil falla mellom to stolar. Viss me ikkje får brukt interessene våre eller får fyrstevalet av programområde, så er det lettare å bli skuleleie og i verste fall droppe ut. Er det å snevre inn tilbodet i distrikta vegen å gå for å få fleire til å fullføre vidaregåande skule? Me meiner at Vestland fylke framleis må tilby KDA i distrikta. Dette er ein kreativ veg til generell studiekompetanse. Når me går på vidaregåande i heimtraktene, er det også meir naturleg å komme attende seinare og bidra i lokalsamfunna.

Nokre av oss drøymer om å bli arkitektar eller motedesignarar. Eller kanskje blir me grunnskulelærar, sjukepleiar eller politi, som me også kan bli etter KDA. Det er urettferdig om det berre er byungdommen som kan følgje draumane sine! Ikkje legg ned KDA i distrikta.

Me ber privatpersonar og fagfeltet om å skrive høyrings-svar, frist 20.mai.