Ny 5-årig lærarutdanning i praktisk og estetiske fag

I 2017 blei grunnskulelærarutdanninga femårig. Frå hausten 2022 blir den tidlegare faglærarutdanninga i design, kunst og handverk også femårig. I tillegg blir den to- eller tre-fagleg.

Kunnskapsdepartementet nedsette i 2018 eit utval for å utgreie og utvikle ei femårig lærarutdanning i praktiske og estetiske fag. Endringane blei omtala i strategien Skaperglede, engasjement og utforskertrang der det står;

«Regjeringen har bestemt at masterutdanning skal være hovedmodellen for norsk skolerettet lærerutdanning. Vi må ha nok lærere i alle fag, og vi må ha like høye ambisjoner for lærere i alle fag» (Kunnskapsdepartementet, 2019).

To eller tre undervisningsfag og master

Den nye femårige utdanninga blir no realitet og har fått namnet Lærarutdanning i praktiske og estetiske fag for trinn 1-13, tilføya namnet på masterfaget. Masterfaget i utdanninga (fag I) skal vere eitt av følgande fag: (a) dans, (b) design, kunst og handverk, (c) drama og teater, (d) kroppsøving og idrettsfag, (e) mat og helse eller (f) musikk. Masterfaget svarer til 120-150 studiepoeng (stp), avhengig av omfang og skal innehalde ein praktisk-estetisk komponent. Studentane skal også ha eit fag II og kan velje eit fag III. Dersom studenten vel eitt fag i tillegg til masterfaget gjev dette 60 studiepoeng og dersom studenten vel to fag i tillegg til masterfaget blir det 30 stp i kvart fag. Undervisningsfag II og III kan vere eit anna praktisk og estetisk fag eller fag som til dømes matematikk, norsk eller samfunnsfag. Spesialpedagogikk kan vere fag III (Forskrift om plan for lærerutdanning i praktiske og estetiske fag, trinn 1–13, 2020).

Positive endringar

Førebels er det Institutt for estetiske fag ved OsloMet som kjem til å tilby den femårige lærarutdanninga i praktiske og estetiske fag der studentane kan velje kunst, design og handverk som masterfag. Oppstart av det nye studiet er hausten 2022. -Studentane som vel det nye løpet vil ha kompetanse til å undervise i minst to fag, både i grunn-skulen og i vidaregåande skule. Dette skil utdanninga frå grunnskulelærarutdanninga (GLU) der studentane vel enten trinn 1-7 eller 5-10, seie studieleiar på Institutt for estetiske fag ved OsloMet, Petter William Hansen.

Institutt for estetiske fag ved Universitetet i Søraust-Norge (USN), campus Notodden, ønskjer femårig lærarutdanning i praktisk og estetiske fag velkomen og er i prosess med akkrediteringssøknaden. Instituttleiar Eirin Sæther meiner at den nye strukturen vil gje god moglegheit for fagleg fordjuping for studentane og at godt utdanna lærarar vil vere med på å heve faget sin betydning i skulen.

Langt meir praksis

Ein av dei store endringane er at studentane skal ha meir praksis. I den nye utdanninga skal studentane har minst 130 dagar praksis fordelt på minst fire år.

-Sidan studentane har kompetanse i to fag når dei startar på master, vil det kunne føre til andre inngangar og problemstillingar i masteren enn det vi ser i dag. Studentane vil også ha langt meir erfaring frå praksis enn tidlegare, noko som også vil kunne påverke masteroppgåva, seie professor ved Institutt for estetiske fag ved OsloMet, Laila Belinda Fauske.

Vil styrke kompetansa i skulen

Noko av bakgrunnen for ønsket om ein ny struktur er at halvparten av dei som underviser i praktiske og estetiske fag i grunnskulen manglar formell kompetanse (Perlic, 2019). Tidlegare forsking- og høgare utdanningsminister Henrik Asheim (H) uttalar på regjeringen.no; - De praktiske og estetiske fagene er viktige fag i skolen. Det er et problem at en del lærere mangler utdanning for å undervise i dem. Regjeringen ønsker at alle elever i skolen skal få møte lærere med kompetanse i fagene de underviser i, og en ny masterutdanning for lærere i praktiske og estetiske fag skal bidra til det (Kunnskapsdepartementet, 2020).

I 2023 vil det ikkje lenger vere mogleg å ta opp studentar til den treårige faglærarutdanninga. Førstelektor ved Institutt for estetiske fag ved OsloMet, Randi Veiteberg Kvellestad, er spesielt spent på den nye studentgruppa.

-I dag har vi ein del eldre studentar som har ei utdanning frå før. Når studiet blir femårig i staden for treårig mistar vi nok desse. Studentane kjem truleg til å vere yngre enn det dei er i dag og ha eit anna kompetansegrunnlag, seie Veiteberg Kvellestad.

Studieleiar ved Institutt for estetiske fag, Petter William Hansen, meiner at den nye strukturen er i tråd med fagfornyinga og målet om meir tverrfaglege tenking; -Difor er det viktig at lærarutdanningane legg til rette for at studentane skal kunne tileigne seg tverrfagleg innhald. Vi trur den nye femårige lærarutdanninga i praktiske og estetiske fag med auka omfang og auka praksis vil gje betre moglegheit til å ruste lærarar for ein skule og eit arbeidsliv i stadig utvikling. Eg trur at denne utdanninga, med eit fag II, kan bidra til at desse lærarane i større grad får jobb i heile utdanningsløpet og at deira utdanningsportfølje i større grad blir prioritert ved tilsetting, også i grunnskulen, seie Hansen.

Laila Belinda Fauske trur også at studentane kjem til å stille sterkare ved søking av lærarjobb når dei har formell kompetanse i fleire fag. - På sikt håpar vi også at dette vil styrke den generelle kompetansa i kunst, design og handverk i skulen, seie Fauske.

Kjelder

Forskrift om plan for lærerutdanning i praktiske og estetiske fag, trinn 1–13. (2020). Forskrift om rammeplan for lærerutdanning i praktiske og estetiske fag for trinn 1-13 (LOV-2005-04-01-15-§3-2). https://lovdata.no/dokument/SF/forskrift/2020-06-04-1134

Kunnskapsdepartementet. (2019). Skaperglede, engasjement og utforskertrang. Praktisk og estetisk innhold i barnehage, skole og lærerutdanning. https://www.regjeringen.no/contentassets/c8bbb637891443fea7971ba8e936bca4/skaperglede-engasjement--og-utforskertrang.pdf

Kunnskapsdepartementet. (2020, 3, juli). Nå kommer masterutdanningen for lærere i praktiske og estetiske fag. https://www.regjeringen.no/no/aktuelt/praktiske-og-estetiske-fag/id2722113/

Perlic, Biljana. (2019). Lærerkompetanse i grunnskolen. Hovedresultater 2018/2019 (18). https://www.ssb.no/utdanning/artikler-og-publikasjoner/_attachment/391015?_ts=16b93d5e508