Millionar til praktisk opplæring og fleire læreplassar

I statsbudsjettet 2024 foreslår regjeringa å gi 127 millionar til utstyr for meir praktisk opplæring på 5.-10. trinn. I tillegg skal 485 millionar gå til fleire læreplassar.

– Skulekvardagen er prega av for mykje stillesitjing og for lite variasjon og praktisk læring. Skular over heile landet melder om at dei treng meir ressursar til utstyr og alternative læringsarenaer for å kunne gi elevane moglegheit til å lære med både hovud og hender. Dette lyttar vi til. Derfor foreslår vi å setje av 127 millionar kroner til ei tilskotsordning som går til å gjere skulen meir variert, slik at elevane kan lære meir i alle fag og trivast betre, seier kunnskapsminister Tonje Brenna (Ap).

Pengane til praktisk utstyr vil bli delt ut til kommunane som eit øyremerkt tilskot fordelt på elevtal på 5.–10. trinn.

480 millionar kroner til fleire læreplassar

Framskrivingar frå SSB seie at Norge vil mangle 90 000 fagarbeidarar innan 2035.

– Når ungdom står utan ein læreplass, er dette eit tap både for samfunnet og den einskilde. Derfor foreslår regjeringa 485 millionar kroner til fylkeskommunane for å sikre fleire læreplassar, seier Brenna i ei pressemelding.

Pengane er ei vidareføring av tilskotet for 2023 og skal styrke arbeidet med å både kvalifisere elevar til læreplass, formidle læreplassar og skaffe fleire læreplassar.

Positiv utvikling

Sjølv om det er ein sped start, øknomisk sett, synst Kunst og design i skolen det er svært positivt at regjeringa vil setje av midlar til praktisk utstyr på 5.-10. trinn. Satsinga på ein meir praktisk skule krev mellom anna øyremerka midlar til opprusting og vedlikehald av verkstadar, og til innkjøp av materiale og verktøy. 127 millionar er eit steg i riktig retning.

Det er også svært positivt at regjeringa vil vidareføre tilskotet for 2023 når det gjeld å kvalifisere elevar til læreplass, formidle læreplassar og skaffe fleire læreplassar, slik at fylkeskommunane kan arbeide langsiktig med dette.