822 signaturar sendt til UDF

Tidleg i haust tok faglærar Siri B. Jakobsen initiativ til eit opprop som krev meir tid til for- og etterarbeid for lærarar i kunst og handverk. Dette oppropet støttar vi.

Oppropet er signert av 822. Mange av kommentarane handlar om at den høge undervisningstida slit på helsa, motivasjonen og samvittigheita; Med dårlege rammevilkår får ikkje elevane god nok opplæring i faget. Fleire av lærarane som har signert underviser i andre fag i tillegg til kunst og handverk. Dei skriv at undervisningstida i faget kunst og handverk er urimeleg.

Den høge undervisningstida i faget står i sterk konflikt med tida læreplanen i praksis krev til for- og etterarbeid. Ved mange skular er diverre kunst og handverk eit nedprioritert fag, det vere seg mangel på verkstadar, materiale, kompetanse og delte grupper. For lærarar i faget blir det for mange kampar å ta. Vi vil at Utdanningsforbundet tar denne kampen på alvor ved å prioritere saka når arbeidstidsavtala skal forhandlast ved neste korsveg. Avtala, slik den er i dag, opnar for at det blir gjort avtaler lokalt. Vi meiner at Utdanningsforbundet må stå fram og tale vår sak. Det er både urimeleg og usolidarisk at eit fleirtal prolongerer ei avtale som i så stor grad utnyttar eit mindretal.

I tillegg til oppropet initiert av Jakobsen har vi i dag sendt eit brev, kommentarar frå oppropet og artikkelen om undervisningstid vi skreiv i tidsskriftet FORM til Utdanningsforbundet og Norsk lektorlag.

Vi følgjer opp saka.